US Supreme Court-in travel ban hman a remti

US Supreme Court chuan President Donald Trump-an Muslim tamna ram paruka chengte US-a an zin khapna thupek a siam chu hman a remtihsak ta.

Thawhṭanni khan court chuan he policy hi a ngaihtuah a, judge pakua zinga pahnihin thlawp lo mah se a tam zawkin an thlawp avangin hman a remtihsak ta a ni.

President Trump-an travel ban a siam hian Chad, Iran, Libya, Somalia, Syria leh Yemen ramte a huam a ni.

September thla khan travel ban hi a ṭum thumna turin President Trump chuan a puang leh a, he thupek hi Richmond, Virgina, San Francisco leh California-a federal court-ahte khin let nghal a ni. October thlaa he khapna thupek hman tura tih hun a thlen hma lawk han, lower court-te chuan zin luh khapna thupek hi court-ah khinlet a nih avangin hman rih loh turin alo ti a ni.

Mahse Thawhṭanni khan Supreme Court chuan lower court-te thupek hi tihtawpsakin, President-in zin luh khapna thupek a siam hi a nihna ang taka hman a remti ta a ni. Court chuan San Francisco leh Richmond-a appeal court-te pawh travel ban khin letna te chu rang taka ngaihtuah turin a ti bawk.

President Trump-an Muslim rama chengte zin luh khapna thupek a siam hi human rights leh refugee group hrang hrangte chuan an sawisel nasa hle. Thupek khinglettu zingah hian American Civil Liberties Union (ACLU) pawh a tel a, mitinten zalenna leh intluktlanna an neih theihna turin an bei zel dawn tih an sawi.