Yemen President hlui thah a ni
Yemen President aṭanga paihthlak, Ali Abdullah Saleh chu Houthi helhoin an ram khawpui, Sanaa bulah an that.
Ali Abdullah Saleh thah a nih thu hi Thawhṭanni khan Sanaa khawpui thununtu, Houthi helpawl hnuaia interior ministry chuan a puang a, ahnuah Saleh-a party General People's Congress (GPC) pawhin a rawn nemnghet ve leh a ni.
Houthi hel hian Saleh-a in rocket-propelled grenade hmangin an bei a, a hnuah Sanaa khaw daiah a car pawh chu an kap leh nia sawi a ni. Helhoin an beihnaah hian GPC assistant secretary general Yasser al-Awadi pawh a thi tel a ni.
Houthi TV network-ah interior ministry chuan Saleh leh a zuitute thah an nih thu hi a puang a, Saleh leh a zutiute hian kawngpui dangin civil mite an that a, hmelma ramte an thawhpui bawk a ni, a ti. Ministry chuan khawpui chhunga hmun pawimawhte chu an la vek tih sawiin, khawpui leh a chhehvel province dangah pawh venhimna lam khauh taka kalpui a nih thu a sawi.
Saleh hian thah a nih hma ni hnih liamtaah Houthi pawl nena an inzawmna hi a titawp a ni. Kar kalta Inrinni-a TV-a thu a sawiah, Saudi kaihhruai Arab ṭangrual te nena inbiakna nei tura a inhawn thu a sawi.
Kum 75 mi, Saleh hi kum 30 chuang Yemen ram hruaitu a ni a, kum 2012 khan paihthlak a ni. Mahse paihthlak a nih hnuah pawh an ramin tualchhung buaina a hmachhawn mekah a inrawlh zui reng a ni. Houthi helte hian kum 2014 September thla khan Iran thlawpnain, Sanaa khawpui hi an la a, Saleh-a thlaktu President Abd-Rabbu Mansour Hadi chu Saudi Arabia-ah a tlanchhe zui a ni. Hadi hian Saudi Arabia kaihhruai Arab ṭangrual ramte chuan an thlawp a, hei vang hian kum 2015 March thla aṭang kha Hadi-a kaihhruai sorkar tundin a nih leh theih nan Houthi hel lakah beihpui an thlak ṭan a ni.
Saudi Arabia kaihhruaiten Sanaa beihpui an thlak hnuah, Saleh hian Houthi hruaitute a thlawp thu hi a sawichhuak a ni. Mahse kar hmasa khan Houthi a thlawpna hi titawpin, Arab ṭangrual ramte nena thawkho tura inbiakna nei tura a inhawn thu a sawi a, hei vang hian Houthi helte hian an that ta a ni.