Nelson Mandela vuina sum tihchingpen a ni

South Africa corruption watchdog chuan kum li liamtaa South Africa hero Nelson Mandela vuinaah official-ten dollar tam tham tak an tichingpen tih a sawi.

Kum 2013 December thla khan Mandela hi Qunu, Eastern Cape-ah vui a ni a, a vuina inkhawmah hian khawvel ram hrang hrang hruaitu eng emaw zat an tel a ni. Kum li a liam hnuaah a vuina atana sum senral a nih dan chungchang hi chhui chiang turin public protector Busi Mkhwebane chuan President Jacob Zuma a ngen a ni.

Corruption watchdog-in phek 330-a chhah report a tihchhuahah, Eastern Cape official-te chuan Mandela vuina tur sum tam tak an tihchingpen thu a sawi a, rorellai ANC party chuan official-te hnenah hian tihtur te hriattirin hemi atan hian sum pawh a pe chhuak a, mahse official-te hian a nihna turah sumte hi an hmang lo tih a sawi. Dik lo taka thiltitute chu manchhuah ngei an duh thu tarlan a ni bawk.