Iran-in sipai thattua puh Mi 5 thi turin hrem

Iran thuneitute chuan Iran sipai, Islamic Revolution Guard hnuaia paramilitary force member thahtua puh, mi pangate chu thi turin an chungthu an relsak a, mi dang 11 pawh tang turin a hrem bawk.

Iran state news agency, IRNA chuan mi 13 leh kum tling lo pathumte chu Revolutionary Guard-a paramilitary volunteer branch, Basij member Ruhollah Ajamian thattua puhin thubuai siamsak an nih thu a tarlang. Revo­lutionary Court chuan an thubuai hi ngaihtuahin, mi pangate chu tihhlum turin a ti a ni. Hrem tawkte hi an hming leh nihna puanzar a ni lo a, mahse court-in hremna a pek hi an appeal thei dawn niin IRNA chuan a sawi.

Revolutionary Court hi kum 1979 Islamic Revolution a thlen hnua din niin, thi tura hremna hi a pe fo a ni. Amnesty International-in a tarlan danin, kum 2021 khan Iran ramah hian thiam loh chang mi 314 tihhlum an ni a, hemi kuma Middle East bial puma mi tihhlum zinga a zahve aia tam chu Iran rama thleng hi a ni. Kar liam ta khan Israel intelligency agency, Mossad thawhpuia puh mi pali tihhlum an ni leh a, an puhna finfiahna pawh hi mipui hmuhah engmah pholan a awm lo.

Hetih lai hian hijab dan zawm ṭha loa puha man, kum 22 mi Mahsa Amini chu police kuta a awm laia a thih avanga ram chhung hmun hrang hrangah lungawi lohna lantir chu sorkar laka lungawi lohna lantirnaah hmang chhoin an nawrh huaihawt hi thla thum a tling tawh a ni. Iran chuan tualchhung buaina an neih mekah khawthlang ramte chu inrawlhah a puh. Nawrh huaihawt zingah mi 18,200 vel chu man ni tawhin, security force-te kutah mi 473 an thi tawh bawk niin Iran-a Human Rights Activists chuan a tarlang.

Nawrh huaihawtte hian Thawhṭanni aṭang khan ni thum chhung ram pumah lungawi lohna lantir turin mipuite an sawm a, social media lamah thehdarhin ni thum chhung chu dawr leh sumdawnna hmunte khar a, bank pawh hmang lo turin mipuite an ngen. Hetih lai hian judiciary hotu, Gholamhossein Mohseni Ejehi chuan dawr khar tura nawrtu leh nawrh huaihawt tura mipuite sawmtute manna thupek a tichhuak.