Xi Jinping-a'n USD tld 29 hu inremna siam turin Saudi Arabia tlawh

China president Xi Jinping chu khawvela oil thawnchhuak tam ber ram, Saudi Arabia-ah ni thum cham turin nimin khan an ram a chhuahsan a, Saudi lal Salman bin Abdulaziz Al Saud nen inbiakna an nei ang.

China President Xi hi coronavirus hripui len hnuah vawi thum chiah rampawnah a la zinchhuak a, kum 2016 hnua Saudi Arabia a tlawh lehna hmasa ber tur a ni. Saudi Arabia ram lal Salman sawmna angin, ram pahnihte hian sumdawnna leh thawhdunna chak zawk neih tumin hma an la dawn tih official Saudi Press Agency (SPA) chuan a tarlang.

Bilateral summit neih chhung hian USD tld 29 hu inremna an ziak dawn tih SPA chuan a sawi. An hmalakna tur zingah, USD mtd 500 senna tur, tunlai thiamna sang tak hmanga facial recognition leh surveillance technology thui tak innghahna tur, NEOM khawpui siamte pawh a tel.

China-a Ministry of Foreign Affairs thupuangtu Hua Chunying chuan Xi hian Saudi Arabia tlawhin, Riyadh-ah China-Arab States Summit hmasa ber leh China-GCC Summit a chhim nghal dawn tih a sawi.

United States leh khawthlang ram te nen an inkar a ṭhat tawk loh avangin, China chuan Middle East ramte nen thawkdunna thuk zawk neih tumin ṭan a la chho mek a ni. China hi Saudi Arabia sumdawnpui ram lian ber a ni a, Saudi oil thawnchhuah hmun li a ṭhena hmun khat vel an lei ṭhin.