China-in Canada, Australia leh Britain nena inremna titawp

China chuan Hong Kong-a security law thar a hman duh loh vanga ram pathumin Hong Kong nena extradition treaty an siam tawhte an tihtawp thungrulh nan; Canada, Australia leh Britain nena tang inthleng tawnna tura inremna an lo siam chu a titawp ve. 

Heng ram pathumte hi 'Five Eyes' intelligence alliance zinga mi an ni a, member dang, New Zealand chuan Hong Kong nena tang inthlenna tura inremna an lo siam tawh hi a titawp tawh a, US pawhin tihtawp a tum thu a lo sawi tawh bawk. Security law thar hian Hong Kong sorkar thuneihna a tihnep sak a, China sorkar laka lungawi lohna lantirte pawh awlsam takin hremna pek theih an ni tawh dawn a ni. Hei bakah hian thubuai neite chu mainland China-ah an chungthu ngaihtuah tura thawn theih an ni tawh dawn a, hei hi ramdangte chuan an duh lo zual a ni. 

China foreign ministry thupuangtu Wang Wenbin chuan Canada, Autralia leh UK-te chuan judicial lama Hong Kong nena an thawhhona chu an politicise a, hei hi thil ṭha lo tak a ni, a ti. Hei vang hian China chuan heng ram pathumte inremna a lo siampui tawh chu a titawp ve ta a ni, tiin a sawi. Ram dangte chu China ram chhung inrelbawlnaa inrawlhah a puh.