Taliban-in ni thum inkahhai puan remti

Taliban fiarfiakte chuan Afghanistan sorkar nen ni thum chhung atan inkahhai puan an remti.  

Inkahhai puan an remtihna chhan hi Zirtawpnia Muslim festival, Eid al-Adha hman dawn vang a ni. Afghanistan president Ashraf Ghani chuan Thawhlehni khan Taliban jail tang mi 5,000-te chu chhuah vat an nih theih nan hma an lak mek thu a sawi a, hemi kawngah hian Taliban hruaitute nen inbiakna an neih hmasak a ngaih thu a sawi.

Kumin February thla khan US leh Taliban chuan inremna an ziak a, an inremnaah hian Afghanistan sorkarin Taliban mi leh sa jail-a an khungte chhuahna tur pawh a tel a ni. Taliban-te chuan inremna siam ang hian an mi leh sate chu chhuah thuai turin Afghanistan sorkar a phut a, tualchhung buaina pawh a chhuah phah fo a ni. 

Taliban leh Afghanistan sorkar hi tang chhuah tur chungchangah inremna an nei fo tawh a, sorkar lam hian kumin March 14 khan chhuah turin a lo in sawi tawh bawk a, mahse tun thlengin chhuah an la ni lo. Afghanistan president thupuangtu Sediq Sediqq chuan an ram mipuite chuan inkahhai hi rei tak chhung neih an duh tih a sawi a, mipuite duhdan chuan Taliban leh sorkar hian inbiak remna nei thuai thei se an duh tih a sawi bawk.

Taliban thupuangtu Zabihullah Mujahid chuan Eid al-Adha hun lo thleng tur atan inkahhai puan a nih thu sawiin, thlamuang takin an ram mipuite chuan he hun hi an hmang thei dawn tih a sawi. Eid al-Adha hman zawhah hian Taliban leh Afghanistan sorkar hian inbiakna an neih hmel niin media-te chuan an tarlang.