US President Trump-a thutlukna siamin sawisel a hlawh
US President Donald Trump chuan Nilaini khan Jerusalem chu Israel khawpuia a pawm thu a puang a, hei hi ram hrang hrang hruaitu, a bikin Arab leh Muslim ram hruaituten an sawisel zui nasa hle.
US sorkar thutlukna puan tur chungchang hian a hma aṭangin ngaihven a hlawh hle a, Israel khawpuia Jerusalem pawm a nih chuan Israel leh Palesitian inkara remna zawnga hmalakna pawh a tibuai thei dawn niin an sawi a ni. President Trump chuan Israel khawpuia Jerusalem a pawm thu a puan bakah, US embassy pawh Tel Aviv aṭangin Jerusalem-ah sawn a tum tih a sawi a, mahse hei erawh chu tun maia tihfel a la ni lo ang. Ram hrang hrang hruaitute chuan Nilainia President Trump-a thupuan hi an sawizui nasa hle a, Lebanon President Michel Aoun chuan US sorkar thutlukna siam hi Middle east boruak tichhe thei a nih thu a sawi. Jordan pawhin Israel khawpui atana Jerusalem pawm anih chuan East Jerusalem-a Paletinian ram a luahsak pawh an pawmsak nghal tihna a ni dawn a, hei vang hian he thutlukna hi thil dik lo, dan kalh thil a ni, a ti.
Jordan sorkar thupuangtu Mohammad al-Momani chuan US sorkar thutlukna siam dan chuan Muslim mai ni lo, Arab rama Kristian-te pawh a ti thinur niin a sawi.
Qatar foreign minister Sheikh Mohammed bin Abdulrahman Al Thani chuan Trump-a thupek puan chu Middle east-a remna zawngtute tana thi tura hremna pekna ang mai a nih thu a sawi.
France President Emnanuel Macron pawhin Trump-a thutlukna siam chu an pawmpui loh thu a sawi a, Israel leh Palestinian ram dinna tura hmalakna chu an thlawp thu sawiin, Jerusalem chu ram pahnihte tan khawpui a ni, a ti.
Pakistan Prime Minister office chuan thuchhuah siamin, US thutlukna siam chu international law leh UN Security Council resolution palzutna a nih thu a sawi.
Turkey President Recep Tayyip Erdogan chuan Jerusalem dinhmun dik tak chu hum zel a pawimawh thu sawiin, Muslim ramte chu an ṭanrual a ngai tih a sawi bawk.
UK Labour party hotu Jeremy Corbyn chuan Trump-a thiltih chu muanna tiderthawng thei thil a nih thu a sawi, he thil hi Britain sorkar chuan a dem thu sawi.
Tunisia labour union UGTT chuan indona puanna anga an ngaih thu sawiin, mipuite chu Trump-a thutlukna siam dodalna lantir turin a ti. National Iranian American Council president Trita Parsi pawhin thutlukna mawlmang ber a nih thu a sawi bawk.
Hetih lai hian Israel ram hruaitu hrang hrangte chuan US President thutlukna siam lawmawm an tih thu an sawi thung. Israel Prime Minister Benjamin Netanyahu chuan an ram tan thil chhinchhiah tlak, hriatreng tur thil a nih thu a sawi a, Jerusalem chu Juda-te tan kum 3000 zet an khawpui a lo ni tawh a ni a, a ti. Kum 3,000 chhung Israel chu an ram mipuite beiseina, duhthusam leh ṭawngṭaina innghahna a ni tiin a sawi.
Israel President Reuven Rivlin pawhin President Trump-a thupuan chu lawmawm a tih thu sawiin, Israel independence state chuan kum 70 a tling dawn hnai tawh a, hemi atana hei aia thilpek duhawm hi a awm lo a ni, a ti. Israel khawpui atana Jerusalem pawm a, he khawpuia embassy-te sawn vek chu an ram chhung ngeia Juda-te dikna chanvo hriatpuina leh pawipuina a ni tiin a sawi.
UNSC-in meeting nei dawn
US President-an Israel khawpuia Jerusalem a pawm thu a puan chungchang ngaihtuah hian United Nations Security Council (UNSC) chuan vawiin hian emergency meeting a nei dawn. Emergency meeting ko tur hian France, Bolivia, Egypt, Italy, Senegal, Sweden, UK leh Uruguay te chuan an ngen a ni.
UN-a US permanent representative Nikki Haley chuan Trump-a thutlukna siam chu huaisenthlak leh thil chhinchhiah tlak anih thu a sawi. US official-te pawhin Israel khawpui atana Jerusalem pawm hi thil thar danglam ni lovin, thil ni sa reng, America sorkarin a pawm nghehna mai niin an sawi a, mahse a ramri leh a huam tur chin erawh chu la sawi fel tur chi a nih thu leh, hmun thianghlimte chu tihbuai a nih loh tur thu a sawi.