Russian President Putin-an president a chuh leh dawn

Russia President Vladimir Putin chuan nakkuma an ram president thlanna neih turah chuh leh a tum tih a sawi.

Volga city-a car factory-a thawkte hmaa thu a sawinaah, Putin chuan inthlana chuh a tum leh thu hi a sawi a ni. Putin hi kum 2000 aṭang khan thuneihna a chelh tawh a, president leh prime minister dinhmunte a chelh a ni. Nakkum March thlaa inthlana a chak leh a nih chuan, president dinhmun hi kum 2024 thleng a chelh thei dawn a ni.

Russian TV journalist Ksenia Sobchak-i chuan president thlanna neih turah hian a chuh tur thu a lo sawi tawh a, mahse Putin hi a ding leh a nih chuan awlsam taka a tlin rin a ni. Russia eptu hruaitu, Alexei chu sum tichingpena puhnaa thiam loh chantir a nih avangin inthlan hi a chuh thei dawn lo a ni.

Sawiseltu lam chuan Putin chu eiruknaa inhnamhnawihin, dan loin Crimea bial pawh a laksak nia sawiin an sawisel a, ram hrang hrangte pawhin an dem thu an lo sawi tawh a ni. Hetihlai hian Russia mipuite lakah erawh a la lar hle a, hruaitu chak leh an ram dinhmun sawhngheh saktu angah mi tam zawkin an ngai.