Turkey Parliament-in social media law thar a pawm

Turkey Parliament chuan sorkarin social media lama thununna sang zawk a neihna tur, social media law thar a pawm. Mahse he dan pawm thar hian sawisel a hlawh zui nghal hle a, freedom of expression khuahkhirhna tur nia ngai an tam. 

Nimina Parliament-in dan a pawm thar hnuaiah hian, social media company lian - Facebook leh Twitter-te chuan Turkey ramah tualchhung mi, an aiawh tur an neih ngei a ngai dawn a, thu leh thil dang post theih tur china court-in thupek a siamte pawh an zawm a ngai a ni. Hei hi an zawm loh chuan sum chawitir theih an nih dawn bakah, bandwidth chu 90% thlengin tihhniam sak theih an ni ang. 

Social media dan thar siam tura rawtna hi rorellai Justice and Development (AK) Party leh a thawhpui, National Movement Party (MHP) thehluh a ni. Human rights group leh eptu party-te chuan mimal zalenna rahbeh sak theihna tur a ni tiin an dodal hle a, mahse Parliament-ah a tlang ta tho a ni. 

Dan thar siam dodaltute chuan print leh broadcast media platform-te chu sorkar thununna hnuaiah vek an awm tawh a, social media chu mipuite zalen taka an ngaihdante an tarlan ve theihna chhun a ni tih an sawi. Mahse hei pawh hi sorkar chu a thunun leh dawn tak avangin an ram tan hun thim inṭanna tur ang hiala ngaite an awm.