Palestinian-ten Trump-a laka lungawi lohna lantir

US President Donald Trump-an Israel khawpuia Jerusalem a pawm thu a puan chuan Palestinian-te a ti lungawi lo hle a, hmun hrang hrangah Trump-a laka lungawi lohna lantirin kawngzawh an huaihawt.

Palestinian miten President Trump-a laka lungawi lohna an lantirnaah hian East Jerusalem leh West Bank-ah Israel security force-te nen an innawr buai a, Gaza Strip-ah chuan US flag leh President Trump-a limte an hal bawk. Israel security force-te chuan buaina chhuak hi a punlun zel an hlauthawn thu sawiin, venthawn thilah West Bank-ah pawh security force battalion eng emaw zat dah luh an nih thu an sawi.

Palestinian-te hian an puala ram hran a din hunah Jerusalem khawchhak lam bial, East Jerusalem chu an ram khawpui atan hman an tum a ni. He hmun hi Israel-in kum 1967 khan laksakin, a luah zui a ni. Israel chuan Jerusalem khaw pum, East Jerusalem pawh tel vekin hmasang aṭanga an ram khawpui ani tawh tih a sawi thung a, he khawpui hi ṭhendarh theih a ni lo a, a ti.

Ningani aṭang khan Palestinian-te chuan US sorkar thutlukna duh lohna lantir a, thinurna lantirna ni thum awh tur an hmang ṭan. Hemi chhung hian West Bank leh Gaza Strip-ah school leh sumdawnna hmunte khar vek a ni dawn a, Jerusalem Old City luhka pakhat, Damascus Gate-ah an pungkhawm bawk a ni.

Israel sipaite chuan Ningani khan West Bank-a hmun 30-ah lungawi lohna lantir a nih thu an sawi a, Palestinian-te hian lung leh firebomb hmangin sipaite an tawng tih a sawi. West Bank-a Bethlehem khuaah mipui pungkhawmte hnawhdarh nan hian water cannon leh tear gas te hman a ni .

Palestinian official-te chuan Israel security force-te nena innawrnaah mi eng emaw zatin hliam tenau an tuar niin an sawi. Tun thla tawplama Israel rama zin a, Bethlehem khua tlawh tumtu, US Vice President Mike Pence pawh an lo lawm dawn lo tih an sawi a, Palestinian ram chinah chuan an lo dawngsawng duh dawn lo niin senior official chuan a sawi.