Myanmar-in ramdangte thawhpuiah a sawm

Myanmar sorkar chuan ramchhung mipui leh ramdangte chu tualchhung buaina chhuahna, an ram khawthlang lama Rakhine state dinhmun siamṭhat leh din thar lehna tura thawhpuiah a sawm.

Union Enterprises for Humanitarian Assistance, Resettlement and Development in Rakhine (UEHRD) deputy chairman, Minister of Social Welfare, Relief and Resettlement ni bawk Dr Win Myat Aye chuan ramdang palai leh United Nations agency-te chu thawhpuiah a sawm a ni.

Myat Aye chuan ramchhunga sumdawng mite nena Rakhine state-a hma an lak tum dan hrang hrangte a sawilang a, heng zingah hian infrastructure lam tihmasawnna tura proejct eng emaw zat siam te, loneitute leh ranvulhte puala economic zone siam te, information technology leh media sector lam tihchangtlun te, hna tam zawk siam te, vocational training buatsaih te, heathcare service tihchangtlun bakah, micro-finance scheme siam leh tourist sector tihchangtlung te a tel.

Minister chuan November 23-a Myanmar leh Bangladesh sorkar in inremna an lo siam tawh angin, Rakhine state aṭanga Bangladesh-a Rohingya Muslim tlanchhiate hruaikir tur chungchanga sorkar hma lak dante pawh a sawi lang bawk. Myamar sorkar chuan UN Secretary General hlui Kofi Annan-a kaihhruai Special Advisory Commission on Rakhine-in rawtna a siamte pawh a kalpui mek a ni, tiin minister chuan a sawi.

Rakhine state boruak hian ngai a awh chho mek a, hei vang hian state khawpui Sittway-a tlanchhiate awmna camp 31 siama awmte pawh an in lamah an kir leh tawh a ni. Tualchhung hotute chuan buaina chhuak vanga in leh lo chante tan ram an pe a, ei turte pawh sem an nih thu official-te chuan an sawi.