Netanyahu-a'n ṭangrual sorkar thar siam thei hnai tawh
Israel prime minister thar tur, Benjamin Netanyahu chuan a kaihhruai Likud party chuan Jewish ultra- Orthodox party, Shas chu inremna a siampui leh tih sawiin, ṭangrual sorkar thar an din thei thuai tawh dawn tih a sawi.
Nimin khan thuchhuah siamin, Netanyahu chuan, "Israel mipuite tana rawngbawl turin, right-wing sorkar thar dinna tur chu kan zo fel thei tawh a ni," a ti.
Shas nena inremna an siam hnu hian, Netanyahu kaihhruai ṭangrual pawl hian an ram Parliament, Knesset-a seat 120 awmah seat 64 an nei tling thei dawn a ni.
Inremna an siam angin, Shas leader Aryed Deri chuan sorkar term chanve chhung interior and health ministry a chang dawn a, term chanve dang lehah finance ministry a enkawl thung ang. Deri hi deputy prime minister-ah a awm dawn nia sawi a ni bawk. Veteran politician, Deri hi chhiah awl ruk chungchanga thiam loh chantir a ni tawh a, mahse a dilna avangin jail-ah erawh dah a ni lo. Cabinet member-a dah a nih theihna tur hian Knesset hian dan a pass phawt a ngai ang.
Right-wing Likud party hian ṭangrual sorkar siam turin extreme right party pathum - Religious Zionism, Jewish Power leh Noam party-te inremna a siampui tawh bawk.
Inthlanpui neihah party mala sorkarna siam thei an awm loh avangin seat la hnem ber, Likud party hotu Netanyahu chu November 13 khan President Isaac Herzog chuan ṭangrual sorkar siam tura sawmin ni 28 chhung hun a pe a, a hun pek hi Pathianni hian a zo tawh dawn a ni. Mahse hun pek chhunga sorkar thar an siam hman lo a nih chuan, Netanyahu hian kar hnih dang hun pek belh turin a dil thei dawn a ni.