Taliban-in tualthattua puh an tihlum

Afghanistan-a rorellai, Taliban chuan Nilaini khan tualthattua puh mi pakhat chu Farah province-ah an tihlum a, tihhlum a nihna hmunah hian Taliban official eng emaw zat an awm a ni.

Nikum August thlaa Afghanistan-a thuneihna an chan hnuah, Taliban-te hian vantlang hriata mi an tihhlum thu official-a a puanna hmasa ber a ni.

Taliban thupuangtu Zabihullah Mujahid chuan,an mi tihhlum hi kum 2017-a mi pakhat vithlumtu a nih thu a sawi. He thubuai hi court pathumin an ngaihtuah a, an pawl hotu lu ber remtihna angin tihhlum a ni ta tih a sawi a, mahse eng angin nge tihhlum a nih erawh a sawilang lo.

Muhajid chuan tualthattu tihhlumna hmunah Taliban senior official te an tel a, an zingah hian interior minister Sirajuddin Haqqani, acting deputy prime minister Abdul Ghani Baradar, chief justice, acting foreign minister leh acting education minister-te pawh an tel tih a sawi.

Supreme Court chuan kum 1990 chhoa Taliban-te ro an rel laia an lo kalpui tawh angin, tun hnaiah province hrang hrangah rukru leh uirete chu mipui hmuhah vuak an nih thu a sawi. UN human rights office chuan Taliban thuneitute hnenah mipuite hmuha mi an hrem leh vuak ṭhin chu titawp turin a ngen.