Peru President thar Dina Boluarte lalut

Peru president aṭanga Pedro Castillo paihthlak a nih hnuah, President thar atan vice presient hlui, Dina Boluarte chu Nilaini khan lakluh a ni.

Dina Boluarte hi Peru-in President atan a hmeichhia a neih hmasak ber a ni. Kum 60 mi, laywer hian kum 2026, July thleng he dinhmun hi a chelh thei dawn a ni.

President thar tana lakluh a nih hnua thu a sawina hmasa berah, Boluarte chuan an ramin harsatna a tawh mek chinfel a, an ram chhanchhuak leh turin mipuite thawhpuiah a sawm a ni.

President paihthlak tak, Castillo hian an ram Parliament, Congress-ah eiruk chungchang vanga amah paihthlakna tur kalpui a nih hma lawkin a himna turin Congress hi ṭhiah a tum a, mahse eptu party-te chuan Congress emergency session koin President paihthlakna tur vote lak a ni. Castillo paihthlak duh lamah vote 101 tlain, a duh lo lamah vote ruk chauh a tla a, vote thlak lo 10 an awm bawk. Paihthlak a nih hnuah Castillo hi police-ten an man a, an ram danpui bawhchhiat tuma phiarru leh helah puh a nih thu public ministry chuan a sawi. Kum 2021 July thlaa President office a luah hnuah, Castillo hian paihthlak tumna chu ṭum hnih a lo paltlang tawh a ni.