Arab League-in President Trump an dem

Arab League secrtary general Ahmed Aboul-Gheit chuan US President Donald Trump-an Israel khawpuia Jerusalem a pawm thu a puang chu an dem thu sawiin, he thutlukna hi thil hlauhawm tak leh pawmpui theih loh, Israel-Palestinian buaina chinfelna tur kawng daltu a ni, a ti.

President Donald Trump-an kar kalta Nilainia Israel khawpuia Jerusalem a pawm thu a puan chungchang ngaihtuahin, Inrinni khan Arab League foreign minister-te chuan emergency meeting an nei a ni.

Meeting hi Egypt khawpui, Cairo-ah neih a ni a, Arab League ram 22-a foreign minister-te an tel.

Aboul-Gheit chuan Trump-a thutlukna siam chu international law kalh a nih thu a sawi a, Palestinian leh Israel inkara remna leh muanna a awm theihna atana US hmalakna pawh a tirinhlelhawm thei zawk niin a sawi. US policy thlak chuan Arab ramten Trump-a sorkar an rintawkna a tichhia a ni, a ti.

Ram hrang hrang hruaitute pawhin Trump-a thutlukna siam hi an dem leh an thlawp loh thu an sawi. US President chuan Israel khawpui atana Jerusalem a pawm thu a puan rual hian, US embassy pawh Tel Aviv aṭanga Jerusalem a sawn turin thupek a siam bawk a, mahse hei erawh chuan tun maia tihhlawhtlin theih a ni rih lo ang.

Kar kalta Zirtawpni khan UN Security Council pawhin US sorkar thutlukna siam chungchang avang hian emergency meeting a nei bawk a, US thutkukna hi an pawm lo tih an sawi a ni . UNSC member-te chuan Jerusalem chungchang chu Israel leh Palestinian hruaituten inbiakna an neih hnuah chauh sawi rem theih a nih thu an sawi. Palestinian foreign minister Riyad al-Maliki chuan Palestinian-te chuan US chu remna leh muanna siam tura hma latuah an ringin an pawm thei tawh lo tih a sawi a, America chu Palestinian chunga inluling leh international law kalha cheah a puh.

US policy puan avang hian Palestinian te chuan lungawi lohna an lantir chhunzawm zel a, Palestinian ram chhung bakah Muslim ram hrang hrangah lungawi lohna an lan tir bawk. Wsst Bank-ah Israel sipaite chuan Palestinian miten petrol bomb leh lung hmangin an tawng a, sipaite hian stun grenade leh rubber bullet hmangin mipui pungkhawmte hi an hnawtdarh a ni. An innawr buaiaah mi paruk man an ni a, midang parukin hliam na vak lo an tuar bawk. East Jerusalem-ah pawh Palestinian miten buaina an siam avangin Israel police officer paliin hliam an tuar a, Palestinian mi 13 chu police officer-te lung leh hmanraw hmanga an tawng avangin man an ni bawk.