Iraq-in IS nena indona a tawp tih puang

Iraq Prime Minister Haider al-Abadi chuan Islamic State (IS) firfiak nena an indona chu a tawp ta tih puangin, Iraq sipaite kutah Iraq-Syria ramri pum chu a awm tawh a ni, a ti.

IS firfiakte hian kum 2014 khan Iraq leh Syria ram hmun zau tak lain, an ram lak chinah hian Islam lalram an din thu an puang a ni. IS ho ram lak huam chhungah hian mi maktaduai 10 vel zet an cheng a ni.

Iraq sipaite chuan an ram chhunga IS firfiakte ram lak chhuh let tum hian beihpui thlakin nasa takin an bei zui a, kumin July thla khan Iraq khawpui pawimawh, Mosul pawh IS kut aṭang hian a lalet a ni. IS hoin khawpui atana an hman, Syria hmarlama Raqqa khawpui pawh November thla khan laklet a ni tawh bawk.

PM Abadi chuan sipaiten ngawrh taka an beih hnuah, Iraq leh Syria ramri-a firfiakte thuneihna ṭhinte chu an lalet tawh a, heng hmunte hi Iraq sipaite thununna hnuaia a awm leh tak vek avangin firfiak nen an indona chu a tawp ta tih a puang a ni.

Abadi chuan an hmelmate chuan an ram tihchhiatsak vek an duh a, mahse an ram mipuite ṭanrualna leh tumruhna avangin an hneh let ta tih a sawi. Iraq sipaite pawhin thuchhuah siamin, Iraq ram chu IS lak aṭanga a zalen tak thu an sawi bawk.