2018 inthlanah Venezuala eptute tel khap

Venezuela President Nicolas Maduro chuan nakkuma an ram president thlanna neih turah eptu party liante chu an chuh khapsak an ni dawn tih a sawi.

President Maduro chuan Pathianni-a mayor poll neih taka tel party-te chauh chu president thlanna neih tura hian an tel phalsak an ni dawn tih a sawi a ni. Pathianni-a mayor thlanna neih kha eptu party, Justice First, Popular Will leh Democratic Action hruaitute chuan an boycott a, electoral system chu fel tawk lo, ṭan lam bik neiah an puh a ni. Mahse President Maduro chuan Venezuelan system chu rintlak niin a sawi thung.

October thla khan eptu party lian pathumte chuan Pathianni-a khawpui 300 chuanga mayor thlanna tur chu an boycott dawn tih an lo puang lawk tawh a ni. Eptute chuan inthlan buatsaih hi President Maduro-a thuneihna tihnghehna tura ruahman mai niin an sawi. President Maduro-a kaihhruai, rorellai party Socialist Party chu mayor inthlanah hian an chak fal hle tura rin a ni.

President-in eptuten president thlana an chuh theih dawn loh thu a sawi hi eptu lam chuan an la chhang let lo a, mahse an helh hle rin a ni. Maduro chuan National Constituent Assembly-in kalphung tur a duan anga puang a nih thu a sawi. Mahse he assembly hi eptu lam chuan democracy kalphung zawm lo nia sawiin an pawm lo tih an lo sawi tawh a ni.

Venezuela ram hian sum lamah harsatna nasa tak a tawk mek a, nitin khawsakna atana mamawhte a vang a, thil man pawh a sang chak hle. Hei vang hian Maduro-a larna pawh hi a tlahniam tawh hle a, a kaihhruai sorkar paithlak duhin eptu lam pawhin lungawi lohna an lantir fo a ni.