Bangladesh-ah eptu hruaitu 2 man

Bangladesh eptu pawlten an ram khawpui, Dhaka-ah prime minister Sheik Hasina ban phuta nawrh huaihawt an tum laiin, police-te chuan eptu pawl Bangladesh Nationalist Party (BNP) hruaitu pahnihte nimin khan an man.

Police-te chuan nimin zing dar 3 vel khan BNP secretary general Mirza Fakhrul Islam Alamgir leh standing committe member Mirza Abbas-te chu an chenna in ve ve aṭangin an man a ni.

Uttara police station officer in charge Zahirul Islam chuan detective branch miten Mirza Fakhrul Islam Alamgir hi an man thu leh, a hma pawha thubuai a lo neih tawh thu a sawi. Hetih lai hian BNP thupuangtu chuan police-te hian an party hruaitu dang, Dhaka mayor hlui Abbas pawh Shahjahanpur-a a chenna in aṭangin an man bawk tih an sawi.

BNP hian an rama rorellai, Awami League hnuaiah inthlan tihchingpen a hlauhawm thu sawiin, prime minister Hasina chu bang a, caretaker sorkar hnuaiah inthlan buatsaih zawk an phut a ni. An thil phut nawrna atan December 10-ah Dhaka-ah kawngzawh huaihawt an tum a ni.

Sorkar lam chuan rally an neih tur dan tumin hma a la niin BNP chuan an puh a, an party mi leh sa 2,000 vel man an ni tawh bawk niin an sawi.

BNP hi eptu party lian ber ni mah se kum 2014 leh 2018-a Parliament inthlanpui an boycott a, PM Hasina kaihhruai sorkar hnuaiah inthlan buatsaih chu a dik tawk lo niin an sawi a ni. BNP chairperson, kum 77 mi Zia chu eiruk thubuai pahnihah thiam loh chantirin, kum 2017 khan court chuan kum 17 jail tang turin a hrem a, Covid-19 hripui len hnuah sorkar chuan ngaihnathiamin, jail aṭanga inlachhuakin Dhaka-a a inah a awm a phalsak a, mahse politics kaihhnawih thiltihna reng rengah a tel a khap thung. Hemi hnu hian BNP chuan a fapa, thubuai eng emaw zata thiam loh chantir tawh, London-a tlanchhe mek Tairque Rahman chu acting chairman atan an thlang a ni.