Brazil-ah nikhat chhungin Covid-19 vanga thi mi 881 awm
Latin America ram zinga economy lian ber, Brazil-ah Thawhlehni khan Covid-19 vanga thi mi 881 an tling a, hei vang hian khawvela he hri vanga thi tamna ber ram parukna a nih phah a ni.
Thawhlehnia hri vanga thi zat hi Brazil-a ni khat chhunga he hri vanga thi tam ber ni a ni a, May 8 khan mi 751 an thi tawh bawk a ni. Brazil-ah hian nimin thleng kha chuan hri kai hi mi 1,78,214 an awm a, heng zinga enkawl dam tawh chu mi 72,597 an ni a, mi 12,461 in an thihpui tawh bawk.
Brazil-ah hian hri hi darh zel mah se, inkharkhipna leh inkhuahkhirna chu mipuiten an zawm ṭha lo hle. Mipuite chuan an ei tur thawhchhuah a ṭul a, hnathawh an ngai tiin an sawi. An ram president president Jair Bolsonaro pawhin inkharkhip hi a thlawp lo a, inkharkhip vangin hna nei lo an tam phah thu sawiin, Covid-19 ai hian inhrekna chuan mipuite a ti chhe thei zawk a ni, a ti.
Bolsonaro hian an rama Covid-19 leng hi a hmain hri leng lian tham a nih loh thu a sawi tawh a, hri leng dona kawnga a hma lakna chu mi ṭhenkhatte chuan an sawisel sak a ni. Hri leng dona kalpui dana an ngaihdan in mil loh vangin a health minister pawh a lo ban phah tawh bawk.