NY-a bomb puakah mi paliin hliam tuar

New York-ah Thawhṭanni khan mi pakhatin improvished explosive device (IED) a tipuak a, mi paliin hliam an tuar.

New York City Mayor Bill de Blasio chuan Thawhṭanni zing lam khan kum 27 mi, Akayed Ullah hian a taksaah low-tech bomb ṭawnin Time Square-ah a tipuak a, amah pawhin hliam na tak a tuar niin a sawi. Midang pathum hliam tuarte erawh an ngaihtuahawm lo nia sawi a ni.

He thil thlen lai hi transit system video-ah lo lak a ni.

New York City Police Commissioner James O'Neil chuan bomb tipuaktu hi Islamic State (IS) firfiak nen inzawmna an neih leh neih loh chhui chian mek a ni thu a sawi. Mayor Bill de Blasio chuan he thil thleng hi firfiaka chetna nia a lan thu a sawi a, bomb tipuaktuin a tum anga pawikhawihna lian tham a thlen lo chu lawmawm a tih thu a sawi.

US Department of Homeland Security chuan pawikhawihtu hi damdawi-inah enkawl mek a nih thu sawiin, a chanchin chhuichianna aṭangin kum 2011-ah family immigrant visa hmangin Bangladesh aṭanga lut a nih thu an sawi.