Israel-ah US secretary of state a zin
US secretary of state Mike Pompeo chu nimin khan Israel-ah a zin a, prime minister Benjamin Netanyahu leh ṭangrual sorkar a siampui tur, Blue and White party hotu Benny Gantz a hmu.
Pompeo hi nimin zing khan Tel Aviv thlengin, Jerusalem lam a pan nghal a ni. Israel sorkar hian hri leng avangin ram pawn lam aṭanga lutte chu kar hnih chhung inkhung hrang zel turin ti mah se, Pompeo erawh ngaihnathiam a ni thung.
Israel-ah hian Netanyahu leh Gantz-te kaihhruai ṭangrual sorkar thar a ding dawn a, sorkar lak thar lakluh tur pawh hi Pompeo zin vang hian sawn hlat a ni bawk.
US secretary of state hian Netanyahu leh Gantz-te chu Israel sorkarin West Bank hmun ṭhenkhat a luahsak tur chungchang a sawipui ang. US chuan Israel sorkar ruahmanna hi a thlawp laiin, Palestinain leh Arab ramte chuan an lawm lo hle thung.