NKorea hotuin ralthuam siambelh zel tiam

North Korea ram hotu lu ber, Kim Jong-un chuan Thawhlehni khan intercontinental ballistic missile, Hwasong-15 siamna kawnga tha thawhtu scientist leh official-te hmuin, nuclear ralthuam tam zawk siam tura hma lak zel a tiam.

Hwasong-15 hi November 29 khan enchhin a ni a, NKorea sorkar official-te chuan he missile hian US ram laili thleng pawh a kap pha niin an sawi. Hetihlai hian zirchiangtu ṭhenkhat chuan NKorea hian US ram pum kap pha tur chuan a missile-te hi a la thuam chak leh tihchangtlun a la ngai niin an sawi.

Kim Jong-un chuan scientist leh hnathawkte chuan ralthuam leh hmanraw dang tunlai ber an siam chhunzawm zel dawn tih a sawi a, NKorea nuclear ralthuam neihte chu a tam lam leh ṭhat lamah thuam belh zel a ni dawn a ni, a ti. Ralthuam chi dang pawh tam zawk siam a ngai tih a sawi bawk.

Kim hian ICBM Hwasong-15 siamna leh hlawhtling taka enchhin a nih theihna tura rinawm leh ṭha taka hna thawktute hnenah medal a hlan nghal bawk a ni. Medal a hlante hi NKorea-in chawimawina a pek san ber, Order of Kim II Sung leh Order of Kim Jong II te an ni. Hei bakah hian scientist leh official-te chu Kim Jong-un a pu leh a pa, Kim II Sung leh Kim Jong Il te hming kerna sana pek vek an ni bawk.