Syria raltlante ṭanpuina tur ruahman

UN agency leh a NGO partner-te chuan Syria raltlan, mi maktaduai nga chuangte ṭanpuina turin dollar tluklehdingawn 4.4 hu ruahmanna an siam.

He ruahmanna siam hi 2018 Regional Refugee and Resilience Plan (3RP) tih a ni.

UN refugee agency thupuangtu, Adrian Edwards chuan Syria ram chuan kum sarih zet tualchhung buaina a tawrh tawh avangin mi maktaduai telin harsatna an tawk a, himna zawngin an in leh lo an tlanchhiatsan a ni, a ti. Syria ṭhenawm ramte chuan raltlante hi lo tuamhlawmin, lo ngaihsak mah se an zinga tam tak chu dinhmun rethei takah, nitin khawsakna atana mamawh pawh neih harsa khawp dinhmunah an la ding mek niin a sawi.

3RP hmang hian kum 2018 chhungin Syria raltlan maktaduai 5.3 te chu kawng hrang hrang–education, health, food, security, livelihood, water and sanitation service lamah ṭanpui an ni dawn a ni. He ruahmanna hnuaia hian humanitarian and development parnter 270 te an thawkho dawn a ni.

UNHCR director for the Middle East and North Africa Bureau leh Regional Refugee Coordinator for Syria and Iraq, Amin Awad chuan Syria tualchhung buaina avang hian khawvel huapah pawh raltlan a pun phah nasa hle tih a sawi a, Syria buaina chu chinfel thuai ni se a duh thu a sawi.

Raltlan zingah hian naupang school kal rual maktaduai 1.7 an awm a, heng mite hi a theih anga lehkha zirtir niin, an zingah maktaduai khat vel chu school kaltir an ni tawh a, hetihlai hian 40% erawh chuan school an kal lo tih a sawi. Heng naupangte tan hian theihtawp chhuah a ngaih thu sawiin, kum 2018 ah chuan an dinhmun a ṭhat zawk tawh a beisei thu a sawi bawk.