OIC-in Palestinian khawpuiah East Jerusalem puang

Organisation of Islamic Co-operation (OIC) chuan East Jerusalem chu Palestine khawpuiah a puang a, ram dangte pawh hei hi pawmpui turin an ngen nghal.

US President Donald Trump-an Israel khawpuia Jerusalem a pawm thu a puan chungchang chu Turkey-a OIC Summitah ngaihtuah a ni. US thutlukna siam chu an dem thu a sawi a, remna leh muanna kawng zawnga hmalakna tichhe thei a nih thu an sawi. Muslim ram hruaitute chuan Nilani khan Palestine ram chu an pawm thu leh, a khawpuiah pawh Israel-in a luahsak, East Jerusalem an pawm thu an puang.

Thuchhuah siamin, OIC member 57 te chuan boruak muanawm tak hnuaia ram pahnih, Israel leh Palestinian din a nih theihna turin an bei zel dawn a ni, a ti. UN hnenah Israel-in Palestinian ram a luahsakte tihtawp tir turin an ngen a, Trump-a kaihhruai sorkar chu hetianga dik lo taka thutlukna a siam chungchanga nghawng ṭha lo a awm a nih pawhin a mawhphurtu vek a nih thu an sawi bawk.

OIC chuan President Trump-an Israel khawpuia Jerusalem a pawm thu a puang chu thil ṭha lo leh hlauhawm tak nia an ngaih thu an sawi a, he thupuan hi rin tlak lo leh dan behchhan mumal nei lo a ni, an ti.

OIC secretary general, Yousef al-Othaimeen chuan US thutlukna siam chu an pawm lo a, Muslim hruaitute chu he thutlukna dodal tura lungrual taka hma la turin a chah bawk. US thiltih dan chu international law palzutna a ni a, Muslim mite rilru tihnatna a ni bawk a ni tiin a sawi. He thil vang hian Middle East leh khawvel ram dangah pawh boruak ṭha lo a thlen phah dawn a ni, a ti.

Palestinian President Mahmoud Abbas chuan Israel-Palestine peace talk neih leh zel turah US chuan Israle duhsak bikna a lantir tawh avangin amah leh amah a in disqualify nghal a ni, a ti. US chu remna palai hna thawk tura rin ngam a ni tawh lo tih a sawi.

Israel hian kum 1967 khan Jerusalem khawchhak lam hi a luah a, kum 1980 khan Jerusalem khawpui pum chu a ram khawpuiah a puang a ni. Mahse ram hrang hrangte chuan Tel Aviv-ah an embassy hi an la dah vek a ni.