Ecuador vice president hlui kum ruk tang turin hrem

Ecuador vice president hlui Jorge Glas chu Brazilian construction firm, Odebrecht in thamna sum a pek chungchanga inhnamhnawiha puh a nih avangin criminal court chuan kum ruk tang turin a hrem.

Odebrecht case-ah hian court chuan mi pali thiam loh chantirin, an zingah hian Glas-a pu, Ricardo Rivera pawh a tel. Midang pathumte hi thla 14 tang turin hrem an ni.

Thiam loh chantir mi pali-te hi sorkar sum an tihchingpen, dollar maktaduai 33.3 chu rul leh tura hriattir an ni bawk.

National Jutice Court President Judge Edgar Flores chuan thiam loh chantir takte thil tih dik lo finfiahna hi US Department of Justice leh Odebrecht executive hlui Jose Conceicaso Santos hnen aṭangin an dawng niin a sawi.

US document a peka a lan danin, Odebrecht hian kum 2007 leh 2016 inkar khan Ecuadorian official-te hnenah public infrastructure contract a hmuh theih nana thamna US dollar maktaduai 33.5 a pe a ni.

Kum 48 mi, Gas hi kum 2009-2010 chhung khan telecommunications minister a ni a, kum 2013 aṭang khan President hlui Rafael Correa leh President ṭanglai Lenin Moreno hnuaiah vice president dinhmun a chelh a ni.