Bangladesh Eptuten lungawi lohna lantir

Bangladesh eptupawl, Bangladesh Nationalist Party (BNP) chuan Inrinni khan an ram khawpui, Dhaka-ah sorkar laka lungawi lohna an lantir a, tel an ṭhahnem hle.

Eptute hian an rama thil man sang chak lutuk avanga an lungawi loh thute aupuiin, prime minister Sheikh Hasina chu bang turin an phut.

Dhaka-ah nawrh huaihawtte leh police-te chu innawr buaiin, nawrh huaihawt zinga mi ṭhahnem tham tak man an ni.

Kawng zawhte chuan an party hruaitu, PM hlui Khaleda Zia leh a fapa Tarique Rahman laka thubuai siamte chu sut turin an phut bawk.

BNP legislator pasarih chuan rorellai, Awami League (AL) party kaihhruai sorkar chu dan dik loa tling nia puhin, an lungawi lohna lantirna atan Parliament member an nihna aṭanga an ban thu a puang bawk a ni.

Kum 2009 aṭanga thuneihna changtu, PM Hasina kaihhruai sorkar hnuaiah an ram inthlanpui tichingpen niin eptute hian an puh. Sorkarin eptu lamte aw chhuah thei loa hrekbeh a tum dan chu human rights activist leh independent observer-te pawhin an lo sawisel fo tawh bawk.

BNP chuan PM Hasina kaihhruai sorkar a din hnuah an party member lakah thubuai nuai 1.8 ziah luh a ni tawh niin a sawi a, party member 600 rukbo ni tawh bawkin, thuneitute remtihna hnuaiah mi 3,000 vel tihhlum an ni tawh a ni, an ti.

Dhaka-a rally neih a nih hma hian sorkar chuan party activist 2,000 vel a mantir a, an zingah hian an hruaitu pahnih, secretary general Mirza Fakhrul Islam Alamgir leh standing committee member Mirza Abbas te pawh an tel.