Ukraine mi mtd 1.5 chuang eng nei loin awm mek
Russia-in Zirtawpni liam ta zana "kamikaze drone" an kahchhuah avangin Ukraine khawpui chhim lam, Odessa-a cheng mi maktaduai 1.5 chuangte chu eng nei loin an khawsa mek tih Ukraine president Volodymyr Zelenskyy chuan a sawi.
Eng pekchhuah lama thuneitute chuan he chhiatna siam ṭha tur hian kar eng nge maw zat an mamawh tur thu leh, a lo berah thla thum emaw vel tal a ngaih an rin thu an sawi.
"Zirtawpni zana Iran drone an kahchhuah hnuah, Odessa leh khawpui dangte bakah region-a khaw tam tak chu kawlphetha hman tur nei loin an thim a ni," tiin Zelenskyy chuan a sawi.
Presidential administration deputy head Kyrylo Tymoshenko chuan infrastructure pawimawh zual, damdawi-in leh maternity ward hnenah chauh eng an pek theih thu a sawi bawk.
Russia-in February 24-a a ṭhenawm ram, Ukraine run tura an fehchhuah hma kha chuan Black Sea port hi Ukraine leh Russia mite tana chawlh hahdamna hmun lar tak ni ṭhin a ni.
Region governor Maksym Marchenko sawi danin, Russia chuan an khawpui chu zan khat thil thuah "kamikaze drones" hmangin an kap a, region-a khua zawng zawng deuh thawah kawlphetha an hmuh loh phah a ni," tiin, Ukraine air defence unit chuan drone pahnih an lo kahthlak sak thu a sawi.
Russia chuan an ram laksa enge maw zat Ukraine laka an hloh leh hnuah, kar hmasa Thawhṭanni khan an infrastructure pawimawhte beih nan cruise missile ṭhahnem tak an kapchhuak a ni. Ningani liam ta vek khan Russia president Putin chuan mi maktaduai chuang khaw vawt leh eng nei loa an awm mek karah Ukraine kawlphetha siamchhuahna hmunte chu beih chhunzawm zel an tum thu a sawi bawk.