Yemen Civil War-ah naupang 11,000 chuang thah/ramtuileiloin awm : UN

United Nations chuan kum riat liam ta aṭanga Yemen-a tualchhung indona thleng chho zelah naupang 11,000 chuangte chu thah emaw ramtuileiloin emaw an awm tawh tih a tarlang. Naupang hamṭhatna tura thawktu, UNICEF chuan buaina avanga thi leh hliam zat te hi chhinchhiah zat aia tam daih an awm an rin thu a sawi. "Naupang tam takin nunna an chan tawh a, natna emaw eitur tlakchham vang emawin mi sang tel thi mai thei dinhmunah an ding mek a ni," tiin UNICEF executive director Catherine Russell chuan a sawi.

Yemin naupang kum tling lo mi maktaduai 2.2 vel chuan an taksa mamawh ang zat eitur an dawng thei lo a, hmun lia ṭhena hmun khat chu kum nga hnuai lam an ni a, chung zinga a tam zawk chu tuihri, sentut leh vaccine hmanga dan theih natna vanga thi thei dinhmunah an ding mek tih UNICEF chuan a sawi bawk.

Kum 2014 aṭang khan Yemen ramah tualchhung indona hi a thleng ṭan a, Iran thlawp Huthi helte'n an khawpui Sanaa chu chhuhsakin, Saudi kaihhruai sipaite chuan sorkar thlawpin an bei let a ni. Tualchhung indona thleng vang hian mi sang tel an thi tawh a, indonain a nghawng tui thianghlim tawk lo vang te, hri leng, ei tur tlakchham leh thil dang dang vangin mi tam takin nunna an chah tawh bawk a ni.

Agency in a chhinchhiah dan chuan, kum 2015 March - September, 2022 chhungin naupang 3,774 an thi. UN hmalakna hnuaia inremna siam chu kumin October 2 khan a tawp. Thla ruk chhung chauh inkahhai an puan hnuah, pawl hnihte hian an chhunzawm duh ta lo a ni. October 2-a an inremna a tawp hnuah naupang 62 an thih belh leh tawh tih UNICEF chuan a tarlang.

UN agency sawidanin mipa naupang 3,904-te chu indonaa tel turin ziahluh an ni tawh a, hmeichhe naupang 90 chuangte chu checkpoint-ah duty tir ṭhin an ni.

UNICEF chuan Yemen mipui harsatna tawk mekte chhawmdawlna atan USD mtd 484.4 an dilsak mek a, "Yemen-a naupangte'n hmabak eng tak an nei dawn a nih chuan, thununna fel tak leh ṭanpuina mumal tak nena an seilen a ngai dawn a ni," tiin executive director Russel chuan a sawi.