Brazil President Bolsonaro thlawptuten Police headquarters an bei

Brazil President kalchhuak tur, Jair Bolsonaro thlawptute chuan Thawhṭanni zan khan an ram khawpui, Brasilia-a police headquarters an bei a, a bula bus leh car-te an hal bawk.

October thlaa Brazil Presi­dent thlannaah Bolsonaro hian Luiz Inacio Lula da Silva a hneh zo lo a ni. Thawhṭanni khan inthlanah Lula leh a vice president an chak thu official-a nemngheh a ni a, nakkum January 1-ah President thar hi lakluh a ni ang.

Bolsonaro thlawptute hian Indigenous leader leh Bolso­naro thawhpui, Jose Aacio Serere Xavante chu nawrh huaihawttua puh chungchanga manna thupek tihchhuah a nih hnuah, Brasilia-a police headquarters hi an bei a ni. Xavante hi President inthlan result pawm lohna lantira nawrh huaihawttu zingah a tel a ni.

Police duty-te chu mipui pungkhawmte hnawhdarh nan hian stun grenade leh tear gas-te an lo hmang ve bawk.

Bolsonaro hian inthlanah a chak loh a pawm thu hi a la sawichhuak lo a, mahse thuneih­na inhlanchhawnna tur erawh buaipui turin a ti thung.