Myanmar-in China aṭangin Mountain Eagle fighter 6 a lei
Myanmar-a sipai sorkar chuan Myanmar Air Force (MAF) hman turin China aṭangin FTC-2000G Mountain Eagle fighter aircraft paruk a lei.
Mountain Eagle hi kum 2003-a an siam ṭan niin China sipai, People's Liberation Army (PLA) pawhin an hmang mek a ni. Myanmar-in aircraft paruk a lei hi Shan state-a Namsang airbase-ah thawh hnihin lak thlen a ni.
China leh Myamnar hian aircraft leina tura inremna hi kumin January thla khan an ziak nia rin a ni a, pakhat hi USD maktaduai 9 man a ni. June thla khan Myanmar Air Force-a pilot, engineer leh armament office-te chuan China hi tlawhin, training an pe nghal nia sawi a ni bawk.
Mountain Eagle Fighter hian MAF-in a hman mek, F-7 leh A-5 thlakna atan an hman rin a ni. F-7 hi Chinese Chengdu J-7 export version a ni a, kum 1960 chhoa siam a ni. A-5 hi Nanchang Q-5 tih ani bawk a, kum 1970 chhoa siam a ni bawk. Heng aircraft-te hi airfield ṭha lutuk lo aṭanga thlawk chhuak leh ṭum thei tura duan a ni.
China hian Myanmar sipaite hi ralthuam a lo pe fo tawh a, a pek zingah hian submarine leh ralthuam lian chi te pawh an tel. Sipai sorkar a din hnua khawthlang ramten an hrek chhoh hnuah, Myanmar hi economy leh sipai ralthuam lamah China kutah a innghat lian tawh hle a ni.