Japan-in nau piang pun theihnan ṭanpuina pek tipung dawn

Japan-ah hun rei tak chhung nau piang zat a tlahniam tawh a, Ministry of Health, Labour and Welfare chuan nau piang an pun theihnan ṭanpuina pawisa an pek ṭhin chu a tipung dawn tih a puang.

Sorkar chuan Childbirth and Childcare Lump-Sum Grant atan yen 4,20,000 (Rs 2,52,338) chu nupa inkara fa nei tharte hnenah an pe ṭhin a ni. Minister of Health, Labour and Welfare, Katsunobu Kato chuan sum an pekchhuah zat chu yen 5,00,000 (Rs 3,00,402)-ah tihsan a tum thu a sawi.

Minister hian Japan prime minister Fumio Kishida pawh a sawipui tawh a, a pawm ngei a rin thu leh sorkar kum thar aṭanga hman ṭan theih an beisei thu a tarlang.

Sorkarin 2021 data a tihchhuahah, Japan hian kum 100 hnua nau pian tlem ber ṭum an tawng mek. Hei hian ram inrelbawlna kawngah nghawng thui tak a neih theih dawn avangin ngaih pawimawh ṭul hleah an ngai a ni. 2021 khan nau piang 8,11,604 leh mitthi 14,39,809 an nei a, mihring tlakhniamna zat hi mi 6,28,205 a tling.