China-a High-Risk group-te Covid Booster dose hnihna pechhuak dawn

China National Health Commission (NHC) chuan natna benvawn nei leh hri kai hlauhthawnawma ding, high-risk group leh kum 60 chin chunglam hnenah Covid-19 vaccine booster an pechhuak dawn tih nimin khan a puang.

Covid booster dose khatna lak aṭanga thla ruk hnuah dose hnihna hi a lak leh theih dawn a, dose hnihna la thei chin zingah natna benvawn neisa leh immunity chak lote pawh an tel dawn tih NHC chuan a tarlang.

Tun thla tira Covid-19 khuah­khirhna khauh tak an thlahdul hnuah China chuan kum 60 chin chunglam hnenah chak taka vaccine pekchhuah tumin hmalakna an kalpui a ni.

Kum 60 chin chunglam zingah dose hnihna la tawh hi August thlaah 85.6% awmin, November khan 86.4%-ah a sang chho hret a, hemi inkar vekah booster la tawh zat 67.8% aṭangin 68.2%-ah an kai chho tawh tih official data chuan a tarlang.

Thla hmasa lawk khan, kum upate hnenah vaccine leh booster lak inkar chu thla thumah a lo titawi tawh a ni.

Hri kai an pun avangin

hnuchhui a har

Khuahkhirhna thlahdul hnuah China-a Covid-19 hri kai an pun chak tak em vangin hnuchhui let chu thil harsa tak a ni tawh tih an rama health body sang ber chuan nimin khan a sawi.

Ram pumah hri leng khuah­khirhna khauh tak, zero-tole­rance policy an tihtawp tak avangin Beijing-ah hri kai hi namen loin an pung chak tih official-te chuan an sawi a ni.

China chuan kum thum dawn hri leng khuahkhirh tuma an beih hnuah, kar hmasa khan mass testing leh quarantine kaihhruainate chu an thlahdul ṭan a ni. Ram pumah testing tihtawp anih tak avangin China NHC chuan hri kai hmuhchhuah zat chu rintlak tawk tawh loah an ngaih thu a puang.