Khawvel pumah journalist man tawk an pung
Press freedom watchdog, Reporters Without Bordres (Reporters Sans Frontieres/ RSF) in a tarlan danin, kum 2022 chhungin khawvel ram hrang hranga journalist man tawk a pung nasa hle.
Kumin chhungin journalist man hi 533 an awm tawh a, nikum khan 488 an awm niin nimina RSF Annual Press Freedom Review tihchhuah chuan a tarlang. Kumin jounalist man zinga a zahve aia tam hi ram panga - China (110), Myanmar (62), Iran (47), Vietnam (39) leh Belarus (31)-a man an ni.
Tun hnaia Iran tualchhung buaina thleng avang khan journalist man zat hi an pung chho hle niin organisation chuan a tarlang.
Journalist tang mek zingah hmun thuma ṭhena hmun khat chuang hret chu thiam loh chantir an ni a, a bakte hi an thubuai nghak mek an ni thung. An zinga ṭhenkhat phei chu kum 20 chuang thubuai ngaihtuah hun nghaka tang te an awm tawh a ni. Hmeichhe journalist tang mek pawh 78 an tling.
Kuminah journalist thah 57 an awm tawh a, 2021 leh 2020 khan 48 leh 50 an awm. RSF chuan kumina journalist thah zinga 80% chu an hnathawh leh chanchin an ziah kaihhnawih thila tum reng vanga thah an ni, a ti.