Covid-19 health emergency nakkumah tihtawp theih beisei

World Health Organisation (WHO) director general Tedros Adhanom Ghebreyesus chuan nakkum hun eng emaw chen aṭang chuan Covid-19 avanga global health emergency puan chu tihawp theih a nih tawh a beisei thu a sawi.

Geneva-a chanchinthar lakhawmtute a kawmnaah, WHO hotu chuan WHO COVID-19 Emergency Committee chuan nakkum January thla hian Covid-19 emergency tihtawp a nih theih dan tur hrang hrangte an sawiho dawn a ni, a ti. Hemi rual hian Covid-19 hripui thlentu ber, SARS-CoV-2 virus erawh a bo mai dawn lo tih a sawi nghal bawk.

"He virus hi a la awm reng dawn a, ram hrang hrangte pawhin thawh lama harsatna siam thei natna, influenza leh RSV (Respiratory Syncytial Virus)-te enkawl dan chu a ngaihtuah zui reng tho a ngai a ni," a ti.

Covid-19 hripui leng vanga ram zawng zawngin zirlai pawimawh tak an zirchhuah chu public health system thuam chak a, hri leng laka invenna leh, hri kai hmuhchhuah ran leh hri leng do hna chak taka kalpui pawimawhzia an hre thar a ni, tiin WHO hotu chuan a sawi. Hri leng dona kawngah intihsiakna lam aiin, thawhhona ṭha leh chak neih a pawimawh tih chu zirchhuah tur pawimawh tak a ni, a ti bawk.

WHO health emergencies program-a technical leader, Maria Van Kerkhove chuan ram hrang hrang chu hri hian a la chamchilh a, hri kai nawn pawh an la awm reng a, kar khata hripui vanga thi report hi 8,000 - 10,000 inkar an la tling tih a sawi.