Peru-ah ni 30 chhung state of emergency puang

Peru president aṭanga Pedro Castillo paihthlak a nih leh, a hnua man zui a nih avanga ram chhung hmun hrang hranga lung­awi lohna lantira buaina a chhuah avangin, Nilaini khan sorkar chuan ni 30 chhung atan an ram pumah state of emer­gency a puang.

Ram chhunga buaina chhuakah hian mi pasarih an thi tawh a, hliam tuar tam tak an awm bawk.

Defence minister Alberto Otarola chuan Nilaini khan ni 30 chhung emergeny puan a nih thu hi sawiin, tharum thawhna leh pawi­khawihna thlengte titawp a, dan khauh taka kengkawh turin police-te chu armed force-ten a pui dawn bawk tih a sawi.

Kar liam ta Nilaini khan Castillo chu presi­dent aṭanga paihthlak a ni a, hel leh inphiarrukna kalpuiah puhin man zui a ni. An ram khawpui Lima bula tan-in ah an hreng mek a ni. President thar atan hian Dina Boluarte chu lakluh nghal a ni bawk.