UN women rights body aṭangin Iran an paih

Iran chu UN women's rights body, United Nations Commission on the Status of Women (UNCSW) aṭangin paih a ni a, he thil hi US ruahman vek niin Iran chuan a puh.

September 16-a hijab dan hmang ṭha loa puha Iran morality police-ten an man, Amini thihna thleng avangin Iran ram chhungah hian lungawi lohna lantir chhunzawm reng a ni. Lungawi lohna lantirtute chunga security force-te chetdan chuan ram hrang hrangte dem a hlawh hle. UNCSW aṭangin Nilaini khan paih a ni zui ta bawk a ni.

Iran chuan heng thil hi US ruahman vek nia puhin, member paih a ni chu international organisation zahawmna tichhetu leh, a hnu zelah pawh nghawng ṭha lo tak nei thei tur a nih thu Iran foreign ministry thupuangtu Nasser Kanani chuan a sawi.

Kumin April thla khan kum li term atan Iran hi UNCSW member atan hian thlan a ni. Member a nihna aṭanga paih tur hian member ram tam zawkin an pawmpui a ngai a ni. Nilainia vote lakah, Iran paih duhtu lamah vote 29 tlain, a duh lo lamah vote 8 a tla a, ram 16 in vote an thlak lo bawk. Iran paih duh lotu zingah hian Russia leh China an tel.

Iran chuan an rama tualchhung buaina chhuakah hian December 3 thleng khan mi 200 vel an thi tawh a, an zingah hian security force mite pawh an tel tih a sawi. Hetih lai hian human rights group chuan nawrh huaihawt zinga mi 450 chuang chu security force-te kutah an thi tawh niin an sawi thung. Iran sorkar chuan nawrh huaihawtnaa tel mi 11 chu thi turin an chungthu a relsak tawh a, kar liamta khan an zinga pahnih chu a tihlum a ni.