Sorkar laka lungawi lohna lantirtu Iran footballer thi turin a chungthu relsak

Iran sorkar laka lungawi lohna lantira nawrh huaihawtnaa tel, footballer Amir Reza Nasr Azadani chu thi turin a chunghtu relsak a ni tih human rights group chuan a sawi.

Azadani hi Isfahan-a nawrh huaihawtte leh security force-te innawrbuai ṭum a, security force pathum thihna chungchangah November thla khan man a lo ni tawh a ni a, 'Pathian laka hel leh indo puang' ah puh zui a ni.

Iran ramah hian thla thum dawn sorkar laka lungawilohna lantir a ni tawh a, nawrh huaihawtna tel zinga mi 27-te chu thi turin an chungthu relsak an ni tawh bawk. Thiam loh chantir zinga pahnih, Majidreza Rahnavard leh Mohsen Shekari chu mipui hmuhah khaihlum an ni tawh bawk a ni. Tualchhung buaina chhuakah hian mi 490 vel an thi tawh bawk.

Iran hmeichhiate zalenna leh an dikna chanvo an neih theihna atana campaigner, kum 26 mi Azadani thi tura hremna pek a nihna hi human rights pawl hrang hrang leh, footballer-ten an sawisel nasa hle a, a hremna hi sut leh tur leh, thi tura hremna dan hman mek chu titawp turin Iran sorkar an phut.