Ukraine-a inbeihna kalzelah mi 8 an thi, 23-in hliam tuar

Ukraine official-te chuan an khawpui Kyiv, chhim lama Kryvyi Rih leh hmarchhak lam Kharkiv-a energy facility leh infrastructure-ah beihpui an thlak chhunzawm zel tih sawiin, thuneitute chuan civil mite chu tawmhimna zawng turin a chah.

Russia state news agency TASS chuan Russia thuneihna hnuaia awm, Luhansk region-a ralthuam hmanga inbeihna vangin mi pariat an thih thu leh, mi 23-in hliam an tuar thu a tarlang. Russia nena an inrina bul lawka mi, Lantrativka khuaah inkahna hi a thleng a, Russia thlawp Joint Centre of Control and Coordinatio-a Luhansk official-te chuan Ukraine hian US siam HIMARS rocket chu Lantrativka lam hawi zawngin an kah thu a tarlang.

Russia missile-in energy region-te an kahfuh avangin Ukraine-a hmun tam zawkah emergency power blackout puan a ni.

Ukraine official-te chuan Russia-in kumthar lamah nasa zawka beihpui thlak an tum avang leh, a bikin an khawpui Kyiv-ah ground assault lian zawk kalpui an tum tih an hriat avangin inpuahchahna ṭha zawk an la mamawh dawn tih an sawi.

United States chuan an huang zauh zelin, Ukraine sipaite chu Germany-ah training an pek tur thu a puang. US hian invenhimna lama ralthuam ṭha mi, Patriot missile defence system chu Ukraine hnena pe turin ruahmanna thui tak an kalpui tawh bawk a ni.