North Korea-in Ballistic Missile 2 kapchhuak leh

North Korea chuan nimin khan ballistic missile pahnih an kapchhuak leh niin a ram ṭhenawm South Korea chuan a sawi. NKorea pawhin weapon system thar, solid-fuel motor chu hlawhtling taka a kahchhuah thu a tarlang.

NKorea hian ralthuam enchhinna vawi duai lo an kalpui tak avangin, Korean peninsula-ah kumin chhung ringawtah ram pahnih sipaite inkarah hian inhmuh thiam lohna a thleng fo tawh a ni. Thla hmasa mai pawh khan NKorea hian intercontinental ballistic missile changkang leh tunlai ber enchhinna a lo nei tawh a ni.

South Korea-a Joint Chiefs of Staff chuan North Pyongan province, Tongchang-ri area aṭangin ballistic missile pahnih hi minute 50 kar danah kahchhuah a nih tih a sawi. Missile hi Japan tuipui lamah km 500-a thui a thlawk a, km 550 chuanga sang thleng a thlawk tih a sawi bawk.

Japan defence ministry pawhin NKorea-in missile a kahchhuah thu hi sawiin, vice defence minister Toshiro Ino chuan missile hi an ram exclusive economic zone (EEZ) pawn lamah a tla nia a lan thu sawiin, "Kan ram muanna leh himna a tiderthawng a, khawvel a ti ral ṭi a, hetianga chetna hi palzam chi a ni lo," a ti.

Khawvel ram ṭhahnem takin weapons programme a kalpui vangin hrekna hrang hrang siamsak mah se, NKorea chuan intercontinental ballistic missiles (ICBMs) siamchhuah lamah ṭan a la mek.

NKorea ram hotu lu ber, Kim Jong-Un chuan an ram chu khawvela nuclear force chak leh thiltithei berah hlankai a tum a, an ram chu nuclear state-ah thlak a tum tih a sawi. Kim chuan nikum khan khawmual emaw tuihnuai emaw aṭanga kahchhuah theih solid-fuel hmang ICBM siam hna kalpui a duh thu hi a lo tarlang tawh a ni.