Ireland PM thar atan India chhulchhuak Leo Varadkar lalut
Ireland Prime Minister thar atan India chhul chhuak, Leo Varadkar chu kar liam ta Inrinni khan lakluh a ni a, PM atana lakluh a nih ṭum hnihna a ni.
Kum 2020-a Ireland ram inthlanpui neihah khan centrist party pathum, Finen Gael, Fianna Fail leh party tenau zawk Greens chuan ṭangrual sorkar an siam a, party lian pahnih Fine Gael leh Fianna Fail party-te chuan ram hruaitu lu ber dinhmun hi inchelh chhawk turin inremna an siam a ni. Inremna an siam angin, term chanve chhung Varadkar hi deputy prime minister-a a awm hnuah, prime minister Michael Martin chu a rawn thlak a ni.
Kum 43 mi, Varadkar hi kum 2017-2020 chhung khan Ireland prime minister a lo ni tawh a, he dinhmun luah thei naupang ber a ni. Vantlang hriatah mahni anpui kawp, gay a nih thu pawh a puang tawh a ni. Dublin-ah piangin, a nu hi Irish a ni a, a pa erawh doctor, India aṭanga pem a ni thung. Trinity College Dublin aṭangin medical degree a zirchhuak a, damlo enkawl hna thawk pahin politics lamah a zuang lut a, kum 2007 khan Dublin khawthlang lamah Fine Gael aiawhin inthlan a chuh ṭan a ni.