Air pollution vangin Iran-ah school khar

Iran ramah boruak bawlhhlawh, air pollution a nasat avangin Pathianni khan an ram khawpui, Tehran-ah primary school khar a ni.

Thuneitute chuan Tehran province chhunga khaw pahnih tih lohah chuan primary school khar vek an nih thu an sawi. Hun eng emaw chen chu Tehran khawpui ho boruak bawlhhlawh khuin a bawh tawh niin an sawi.

Pathianni zing khan Tehran boruak hi chhim lamah 185 microgrammes per cubic metre niin, khawpui lailai laiah 174 a ni. Hei hi World tHealth Organization-in mihring hriselna atana pawi lo china a bithliah, 25 microgrammes per m3 aiin a sang hle a ni.

Tehran province-a lungalhthei khur leh cement factory-te chu khar rih tura thupek an ni a, kum upa lam, naupai lai leh lung lam ṭha lo te chu pawn chhuak lo tura ngen an ni bawk.

Kum 2014 kha Tehran khawpuiah hian boruak bawlhhlawh vangin mi 400 chu lung leh thawk lamah harsatna an tawh vangin damdawi-inah dah an ni tawh a, midang 1,500 vel pawh enkawl an ngaih phah a ni. Health ministry chuan kum 2012 khan air pollution vang hian Tehran-ah mi 4,500 leh an ram pumah mi 80,000 thihna a thlen phah niin a lo tarlang tawh bawk.