Russia leh China-in Joint naval drill an nei dawn

Russia leh China navy-te chuan December 21-27 chhung hian joint naval drill an nei dawn tih Russia defence ministry chuan a sawi.

Ram pahnihte hian kum 2012 aṭang khan kumtin joint naval exercise hi an nei ṭhin a ni. Kumin hian East China Sea-ah ram pahnih sipaite hian nunchan zirhona hi an nei dawn a, missile leh artillery firing-te an nei tel ang.

"He exercise-in a tum ber chu Russia leh China lawng sipaite inkara thawhhona ṭha leh chak zawk siam te, Asia-Pacific region-a boruak muanawm a awm zel theihna tura hmalakte a ni," tiin ministry thuchhuah chuan a tarlang.

Kumin February thlaa Russia-in Ukraine a run hnuah, ram hrang hrang chuan Russia hrekna hi an siam zui a, hemi hnu hian Russia chuan China nena an inlaichinna hi tihlen leh tinghet turin ṭan a la chho hle a ni.

Russia chuan joint drill an neih turah hian an lawnglian pali an tir dawn tih sawiin, heng zingah hian Varyag missile cruiser pawh a tel ang. China hian lawnglian paruk a tir dawn bawk a, heng bakah hian aircraft leh helicopter-te an hmang bawk ang.