Toronto-a inkahna thlengah mi 5 thi Pawikhawihtu a hmunah kaphlum nghal
Canada khawpui Toronto khawpui femah Pathianni tlaia silai hmanga pawikhawihna thlengah mi panga an thi a, pakhatin hliam a tuar.
Apartment building-a silai hmetpuaktu leh law enforcement officer-te an inkah hnuah pawikhawihtu hi kahhlum a ni ve nghal tih Police Chief Jim MacSween chuan a sawi. Hliam tuar hi damdawi-inah hruai nghal niin ngaihtuahawm erawh a ni lo.
Police chuan pawikhawihna thlen chhan hi an chhui chiang mek a, mi kuttuartu leh pawikhawihtu, a hming tarlan loh hian inzawmna an neih leh neih loh hriat a la nih loh thu an sawi.
Toronto hmar lam aṭanga km 30-a hla, Vaughan-ah inkahna hi a thleng a, mitthi ruangte hi building-a aparment hran hranah hmuh an ni. A bula chhungkaw chengte chu sawnchhuah nghal an ni bawk. Canada-ah hian silai hmanga tharum thawhna a hluar chho hle a, handgun khapna thupek lekkawh tura nawrna pawh a len chhoh phah hle.
Kum 2020 April thla khan police lema inthuam mi pakhat chuan Nova Scotia, Canada-ah mi 22 a kaphlum a, hei hi an ram chanchina inkahna thleng rapthlak ber a ni. Canada-ah hian silai hmanga pawikhawihna thleng hi ram puma pawikhawihna thleng aṭanga 3% vel a tling pha ṭawk ṭhin. Mahse, kum 2009 chho aṭang khan silaia inkahna hi a let nga velin a pung chho tawh a ni.
Nova Scotia-a inkahna a thlen zawh hnuah, Canada sorkar chuan kum 2020 May thla khan, military-grade/ assault-style firearm chi hrang 1,500 khapna dan a tichhuak nghal bawk.