Jerusalem chungchangah UNGA special session nei

United Nations Security Council-in US-in Israel khawpui atana Jerusalem a puan thu a demna draft resolution a siam chu US chuan a veto hmangin a hnawl a, hei vang hian nimin khan United Nations General Assembly chuan Jerusalem chungchang ngaihtuah hian emergency special session a ko.

Arab leh Muslim te ngenna angin UNGA meeting hi koh a ni a, Palestinian UN envoy Riyad Mansour chuan General Assembly-ah hian Trump-a thutlukna siam tawh sut leh tura phutna draft resolution chu ngaihtuahin vote lak a ni ang, a ti.

Mansour chuan UNSC-ah member dangte an thlawp chungin, US chuan a veto hmangin draft resolution hi a hnawl a, mahse General Assembly-ah chuan resolution thlawptu tam tak an awm ngei dawn niin a sawi. General Assembly-ah vote hian thutawp siam kawngah awmzia nei thui lo mah se, politics lama innawrna atan thawm a nei lian thei thung a ni.

UN-a US ambassador Nikki Haley chuan UN state hrang hrang hnenah lehkha thawnin, US chuan resolution chungchanga US thutlukna dodal zawnga vote thlakte chu a chhinchhiah zel dawn tih a hriattir. Haley chuan, "President chuan chuan vote thlak dan hi uluk takin a lo thlithlai reng dawn a, kan thutlukna dodal zawnga vote-te chu hriattir turin min hrilh a ni. Hei vang hian member tinte vote thlak dan chu kan chhinchhiah dawn a ni", a ti.

1950 resolution hnuaiah General Assembly emergency special sesison hi koh theih a in a, hei hi an thu ngaihtuah duh chungchang Security Council-in a tihfel theih loh chuan he special session hi ko turin member inthurualten an ngen thei a ni. Hetiang session hi ṭum 10 chauh koh a la ni a, an neih hnuhnun ber chu kum 2009-a East Jerusalem leh Palestinian territory chungchang avanga koh kha a ni.