Pakistan sipai hotuin Saeed-a thlavang hauh

Pakistan Army chief Gen Qamar Javed Bajwa chuan firfiak pawl, Jamaat-ud-Dawa (JuD) hotu Hafiz Saeed-a thlavang hauhsakin, Saeed chuan midangte ang bawkin Kashmir chungchanga a ngaihdante sawi turin dikna a nei a ni, a ti.

Sipai hotu hna a chelh hnua an ram roreltute a kawmna hmasa berah, Bajwa chuan Mumbai khawpui beihnaa mawhphurtu bera puh, Saeed chuan Pakistan mi dangte ang bawkin Kashmir chungchang chu a sawi thei a ni, a ti. Hemi hma hian Pakistan president hlui Gen Pervez Musharraf chuan Saeed-a pawl din, Jamaat-ud-Dawa (JuD) leh Lashkar-e-Taiba (LeT) a thlawp thu a lo sawi tawh bawk.

Gen Bajwa chuan tunhnaia an ram khawpuia sakhaw firfiak pawlten nawrh huaihawt a, buaina an chawhchhuahnaah sipaite an inhnamhnawih nia puhna chu a finfiahna a awm a nih chuan a nihna aṭang a ban tur thu a sawi.

Sipaite leh politics chu inkaihhnawih tir a duh loh thu a sawi rualin, Bajwa chuan senator-te chu policy siamtu tur a ni a, inkaihhruaina tur siam se la, sipaite chuan an hnung an lo zui mai dawn tih a hrilh nghal bawk.