China-ah Covid-19 hri kai an pung chak ; Thla 3 chhungin an ram mipui 60% in hri an kai ring

China ramah Covid-19 khuahkhirhna khauh tak siam thlahdul a nih hnuah hri kai an pung chak hle a, khawpui hrang hrangah damdawi-inte a khat hle a, khumte siam belhin, screening clinic-te siam belh mek an ni.

Health expert-te chuan hri leng dinhmun thlirin, thla thum chhungin China ram mipui, mi tluklehdingawn 1.4 zinga 60% vel chuan Covid-19 hri an kai a rinawm thu sawiin, hemi chhung vek hian mi maktaduai hnih velin an thihphah thei dawn bawk niin an sawi.

Nimin khan China-ah hian hripui vang hian mi panga an thi a, Thawhṭanni khan mi pahnih an thi bawk. China rama hri leng dinhmun chu khawvel ram dangte pawhin an ngaihven chho leh hle.

Hri darh tur venna atana China-in khuahkhirhna, lockdown leh mass testing a kalpui tihtawp phuta mipuiten nawrh an huaihawt hnuah, tun thla tir lam khan China chuan khuahkhirhna a siamte a thlahdul a ni. Hun rei tak kharkhip an nih avangin an ram mipui tam tak hian immunity pawh an nei ṭha tawk lo a, hei vang hian khuahkhirhnate thlahdul a nih hnuah hri kai an pung chho a, hri vanga thi pawh an pun chhoh viau a hlauhthawnawm hle.

Health expert-te chuan hri kai an pun chakna chhan pakhat chu Omicron variant veng tura China vaccine siam chak ṭhat tawk loh vang niin an sawi. Hei bakah hian mipuiten vaccine hi an la ṭha tawk lo nia sawi a ni bawk.

US state department Ned Prices chuan China rama hri leng leh mek chu a insiam danglam chhoh leh chuan China mai ni lo, ram tina miten a hlauhthawnawm leh dawn tih a sawi. Hetih lai hian Chinese Center for Disease Control and Prevention official Xu Wenbo chuan hri inthlak danglam chu a thlen ngei a rinawm, mahse hlauhthawnawm em em tur erawh a ni lo niin a sawi. "Strain thar insiam hi an rawn chakin a darh awlsam ṭhin. Mahse thihna a thlen theihna erawh a hniam thung," a ti.

China ramah hian kum 2019 kum tawp lama Wuhan aṭanga Covid-19 hri a len aṭang khan hripui vanga thi report hi 5,242 an awm tawh. Ram dangte dinhmun ngaihtuah chuan hripui vanga thi hi an la tlem hle.

Hetih lai hian expert-te chuan hripui vanga thi zat report hi a dik tawk lo niin an sawi. Beijing khawpuia hospital leh mitthi vuina hmunte an zirchiannaah, tun hnaiah mitthi an tam hle a, mitthi ruang dahna hmunte pawh a khat reng niin an sawi.