King Charles thlalak chuanna UK pawisa note thar tlangzarh

United Kingdom (UK) lal thar, King Charless III thlalak chuanna,pawisa note thar chu nimin khan Bank of England chuan a tlangzarh. He banknote hi kum 2024 kum laihawl aṭangin mipuite hman theih tura ruahman a ni.

King Charles thlalak hi banknote pound 5,10, 20 leh 50-ah a hmalamah chuantir a ni a, a bak design erawh thlak danglam a ni lo. Banknote thar hi tihchhuah a nih hnuah pawh tuna an hman mek, Queen Elizabeth II thlalak chuanna chu hman chhunzawm zel theih a la ni ang.

Kum 74 mi, Chrales hi September thlaa a nu, Queen Elizabeth II a thih hnuah UK lalah dah a ni. A thlalak chuanna pawisa thir chu tun thla tir lam khan tihchhuah a lo ni tawh bawk.

Bank of England governor Andrew Bailey chuan King Charles III thlalak chuanna banknote thar an tlangzarh thei chu lawmawm a tih thu leh, thil chhinchhiah tlak a nih thu a sawi. King Charles chu banknote-a lal thlalak an dah pahnihna a nih thu a sawi bawk.