Sorkar thar siam turin Netanyahu-a'n hun nei tlem tawh

Israel prime minister thar tura beisei, Benjamin Netanyahu chuan ṭangrual sorkar thar siam turin hun a nei tlem tawh hle. President Isaac Herzog-a'n hun a pek pangngaiah chuan vawiin thleng chauh hun a nei tawh a, mahse hemi bakah hian ni li a la dil belh thei.

Netanyahu hian hun a dil belh a nih pawhin, kar leh Thawhlehni-ah chuan sorkar thar a siam hman ngei ngei a ngai tawh dawn a ni. Hetih lai hian Israel sorkar 37-na siam tur hian Netanyahu kaihhruai, Likud Party chuan ṭangrual sorkar siamna tur hi kar ruk chhung buaipui tawhi, right-wing party ṭhenkhat chu inremna a siampui tawh a ni. United Torah Judaism chu inremna siampui turin inbiakna a la neihpui mek bawk.

November thlaa inthlanpui an neihah khan Likud Party kaihhruai ṭangrual pawh hian Parliament, Knesset-a seat 120 awm zinga seat 64 an la pha a ni. Mahse sorkar thar siam turah an thawhpui turte nen hian chanvo insem dan turah inremna a siampui leh phawt a ni.