US-ah Ukraine President Zelenskyy a zin

Ukraine president Volodymyr Zelenskyy chu US president Joe Biden hmu turin nimin US a pan a, Russia-in kumin February thlaa an ram a run hnua ram danga a zinchhuahna hmasa ber a ni.

US pana a chhuah hmain, Zelenskyy chuan thlasik khawvawt tak an tuar chhoh mek laia Russia-in an ram energy leh water supply lam a beih chhunzawm zel avangin, US puihna nasa zawk dil tura zin tur a nih thu a sawi.

Ukraine President nena an inkawm hunah, President Biden chuan Ukraine sipai puihna tur, UD tld 2 dawn hu an pek tur thu a puang dawn nia sawi a ni. Ukraine sipaite an pek tur zingah hian Russia missile lakah lo invenna tur, Patriot missile battery pawh a tel dawn niin US official chuan a tarlang. Patriot missile battery hman dan hi Ukraine sipaite an la zirtir dawn bawk a ni.

President Zelenskyy hian Biden bakah US national security hotute pawh a be dawn a, Biden nen hian joint news conference neiin, US Senate leh House of Representative joint session-ah thu a sawi bawk ang.

Russia-in Ukraine a run hnuah, US hian Ukraine sipaite puih leh chhawmdawlna tur hi USD tld 20 dawn a pe tawh a, sipaite hman tur hian artillery ammunition, NASAMS air defence system leh high mobility artillery rocket systems (HIMARS) munition-te pawh an pe tel a ni.

President Zelenskyy hian a zinchhuah hma ni, Thawhlehni khan sawi lawk loin Ukraine leh Russia sipaite indo mekna hmun, Bakhmut a tlawh. Ukraine sipaite bulah hun hmangin, award-te a hlan a ni. Indona hmuna awm mek, Ukraine sipaite hian an ram puanzar, an hming an ziahna chu Zelenskyy hi pein, US President Biden leh US Congress hnena peksak turin an lo ngen a ni.